ZEMABAWKISM

Kan hna thil avangin Champhaiah Ni 10 chhung zet mai ka han thang a. MZP lama ka lo hmelhriat tawh tlem azawng ka hmu fuh hlauh mai a. An ti ti ka hriat atangin MZP lama anthawhpui thin pakhat chuan tun tuma MZP inthlanah hian chuh ve  a tum a niawm a. Ama tan engtin nge hma an lakpui ang tih an sawihova, chutah chuan, an zinga pakhat chuan tanpui a duh loh thu leh an inmil lohna thu chu a rawn sawichhuak a. A thian dang, tlema phanchang zawkte chuan an khak ta a. “Ngawi mai mai rawh, I pui duhlo anih pawhin sawichhe suh ang che. Champhai khawchhuak a ni tlat tih hrereng rawh” tiin an khak ta a. Ani pawh chuan, puih ve a that a rin thu chu a sawi zui veleh mai bawk a.

Ka ngaihtuah thin a, an thiltih dan chu kan veng tan hian ka it ta khawp mai a. Tlem lai deuh khan, College leh University Students Union lamah hruaitu kan nei ve fova, khang kan hruaitute te kha chuan anmahniin an beia, an hlawhchuak ni ber hian ka hria. Rual u zawk ten min hrilh ka rilru tinatu pakhat a awm. Hrangbana College SU inthlanah khan kan veng pain a chuh ve a, kan veng atanga zirlai awm tamna section-ah khan Vote a hmuh tlem ber thu min hrilh ka hria. A pawi hle a ni. Mi vengte chuan an veng/khawmi chu vawrh chhuah an tum a, a tlin lohnate chu an haider sak a, an tawiawm hram hram thin.

Mi pakhat thil min hrilh ka hriat reng chu, tak ni maw? Chaltlang ho chuan an vengchhunga an zawrh thilawmte chu hmun dang a mi lei lovin, an vengchhunga zuartute ta an lei talh thin tih min hrilh a. Sorkar hnathawh lian deuh leh politician ho pawhin an vengchhunga mi thun talh an tum tlat thin niin min hrilh a, an awhawm bik hle mai.

Vanneih thlak takin, kan vengah hian Zoram pum huapah pawh duailo tak, mi challang kan nei ve teuh mai. A lawmawm a ni. Heng mite tanpui leh tawiawm hi Zemabawk mipuite bat a ni.  Tualchhung levelah chuan lo inngaina lo viau thin mah ila, khawpawn a pelh tawh chinah chuan intan tham hi kan bat niin a lang. Rampui huapa inthlanna thila an chuh ve anih phawt chuan puih ngei chu kan bat a ni a, kan pui peih lo anih pawhin, kan sawi chhe thiang lo. Zemabawk chawimawitu tura inpe a ni tlat!

-          K.T Pakhuangte

26082007