1996-a NEHU in Degree Course chin lo chu College a behtir tawh loh tura a nawrluih avanga Mizoram sorkarin Plus Two zirna a hawn tak chuk chuk lai khan Zemabawk pawh hian kan lo hre ve a. Khatih hunlai khan Zemabawk Govt. H/S/S-ah hian hawn ve ngei nise tiin kan khawtlang hruaitute hi an vir nasa hle a nih kha. Ama’rawhchu, sorkar lamin kan duhnate chu min tihhlawhtlin sak hleithei ta lova. A hnuaah kan khawtlang hruaitute thahnemngaihna leh sorkar lama kan hotute avangin duhsak kan lo hlawh ta a. Tichuan, kan duh angin Class XII thleng zirna chu Arts subject bik atan min rawn hawnsak ta a ni. Amaherawhchu, kan duh ber chu Science leh Commerce zirna kha a ni a. Harsatna hrang hrang avangin kan duhnate chu tihpuitlin lohvin a awm ta reng a. Kumin hian vanneihthlak takin Science zirna chu kum 10 teh meuh mai kan sual hnu chuan kan lo nei thei ta a ni. A va’n lawmawm tehlul mai em !
Zemabawk-ah Science subject zirna kan neih thu hi an puanni khan ZSU lama kan hruaitu thahnemngai tak, Tv. Vanramliana’n min rawn hrilh hlauh a, ka lawm tak tak a ni.
Science subject hi zirna kawngah hian thil pawimawh, hmasawnna ruhrel siamna tura a lungphum a ni a. Chutiang zirna kan lo nei ta mai hian kan venga zirlaite hma nasa takin a sukaw turah ka ngai a. Zemabawk in Engineer leh Doctor kan neih tlemna chhan chu Science subject kan lak tam loh vang a ni a, kan thlakchham hi nasa takin phuhruk a nih ngei a beisei awm tak zet a ni. Zemabawk atanga Class X passed tha deuh chin leh Science subject zuam deuh ho chuan lak ngei i tum ang u. Kan rualawhna te chu tunah hian kan kawtkaiah hunin a awm a, veng dang pan buai lovin kan bawh chum chum a thain a rinawm.
Zemabawk Govt. H/S/S hi Science subject zirna atana siam anih avangin ka thinlung takin ka lawm a. A hminga zirlai hruaitu kan nih ve laia Chief Minister te Minister dang dang te kan MLA leh Education lam officer engemaw zat kan luhchhuah a, kan sawipui thin lai te ka ngaihtuah hian, khatih hunlai khan hlawhtling lo mah ila, a hnuah kan lo hlawhtling ta a. Ka va’n lawm tehlul em !?! Zemabawk Govt. High Secondary School hi vul zel rawh se.
- K.T Pakhuangte
16042006 1730
No comments:
Post a Comment